Lagjet Partizani, Rruga e Re, Blloku te Tregu i Orizit dhe 28 Nëntori vijojnë të përballen me mungesë të theksuar të furnizimit me ujë të pijshëm në qytetin e Vlorës, pavarësisht premtimeve publike se situata do të normalizohej brenda pesë ditësh.
Edhe pse në disa media është raportuar se furnizimi me ujë ka nisur, qytetarët nga këto zona deklarojnë se në banesat e tyre uji ende mungon. Banorët shprehen se informacionet zyrtare nuk përputhen me realitetin në terren.
Në ato pak zona ku thuhet se furnizimi është rikthyer pjesërisht, qytetarët raportojnë se uji është i ndotur dhe i dyshuar për kontaminim, duke e bërë të papërdorshëm për konsum dhe përdorim familjar.
Prej më shumë se gjashtë ditësh, banorët janë të detyruar të sigurojnë ujë përmes autobotëve private dhe ujit të blerë, duke përballuar kosto shtesë dhe pasiguri serioze për shëndetin e tyre.
Qytetarët kërkojnë transparencë, informim të saktë dhe ndërhyrje të menjëhershme nga institucionet përgjegjëse, duke theksuar se furnizimi me ujë të pijshëm është një nevojë bazë dhe një e drejtë themelore që nuk mund të neglizhohet.
Duket se viti 2026 do ta gjejë qytetin dhe qytetarët sërish në krizë për ujë.
Discussion about this post