Në Ksamili mungon shërbimi shëndetësor 24 orësh, duke krijuar vështirësi për qytetarët. Banorët kërkojnë hapjen e menjëhershme të qendrës sezonale dhe zgjerimin e orarit në atë gjithëvjetore, pasi pritet në spitalin e Sarandës dhe trafiku pengojnë marrjen në kohë të ndihmës mjekësore.
Ksamili, që numëron mbi 6 mijë banorë rezidentë dhe 427 struktura akomoduese, po përballet me mungesën e shërbimit shëndetësor 24 orësh, pavarësisht rritjes së ndjeshme të popullsisë.
Në këtë qytezë funksionojnë dy qendra shëndetësore, një gjithëvjetore dhe një sezonale. E para, me dy mjekë dhe gjashtë infermierë, ofron shërbim vetëm deri në orën 15:00. Banorët kërkojnë që shërbimi të zgjatet gjatë gjithë ditës, për të shmangur udhëtimet drejt spitalit të Sarandës, ku pritjet janë të gjata.
Mjeku Tajar Lako u shpreh se rastet e rënda të pacientëve dërgohen në spitalin e Sarandës. Banorët ngrenë shqetësimin se gjatë verës, trafiku i rënduar e bën edhe më të vështirë marrjen e ndihmës në kohë. Kërkesa është e qartë, shërbim shëndetësor 24 orë, për një komunitet që rritet përtej sezonit.
Discussion about this post