Është shtyrë për më 25 tetor seanca e radhës gjyqësore për banorët e Lumasit, pasi në seancën e sotme ka munguar ekspertja. Avokati përfaqësues i banorëve shprehet se nga ana e tyre është bërë një kallëzim penal ndaj kreut të IKMT Kuçovë dhe një procedim dhe për kryetarin e Bashkisë pasi e akuzojnë për dëmtim të mjedisit.
“Seanca e ditës së sotme ishte joefektive pasi një nga ekspertët mungoi dhe rrjedhimisht domosdoshmëria ishte detyruese sepse duhet të relatohet akti i ekspertimit dhe më pas gjykata të konkludonte me përmbushjen e procesit gjyqësor. Në rastin konkret kjo çështje ka pasur zhvillime të ndryshme, pshm nga ana jonë është bërë kërkesë dhe ka filluar një hetim kundrejt bashkisë Kuçovë, është bërë një kallëzim kundër kreut të IKMT ndaj të cilit ka filluar një proces penal, në SPAK. Një procedim është edhe për kryetarin e Bashkisë të gjitha këto janë ndërthur dhe është duke u zhvilluar një hetim sepse në rastin konkret bashkia Kuçovë ka kryer një dëm të jashtëzakonshëm. Ka marrë vendime pa marrë më parë miratimin e komunitetit dhe më e tmerrshmja është se kjo bashki ka zhvilluar një ujësjellës mbi disa ujësjellësa të tjerë, tha avokati.
Më herët, banorët e Lumasit i kanë bërë thirrje bashkisë së Kuçovës dhe përfaqësuesve të IKMT Tiranë që të marra masën e menjëhershme të pezullimit të punimeve në kanionin e Sinecit, dhe të rehabilitojnë të gjithë zonën e dëmtuar nga punimet e këtij ujësjellësi. Banorët hedhin dyshimet se uji i burimit të Sinecit do të shfrytëzohet për qëllime e përfitime të oligarkëve dhe nuk do të shfrytëzohet për ujë të pijshëm, pasi ky ujë ka në përbërjen e tij një përqindje të lartë squfuri që mund edhe të helmojë njerëzit.
