Ish-kryetari i PD Lulzim Basha ka mbërritur në Kuvend vetëm pak minuta pasi u largua ish-kryeministri Sali Berisha dhe pak orë pasi refuzoi të shkonte në mbledhjen e grupit parlamentar. Basha mbërriti në Kuvend për të ndjekur seancën plenare.
Ish-kreu i PD tha para gazetarëve se kishte refuzuar të shkonte në mbledhjen e sotme pasi po punon për PD dhe jo për t’i shërbyer interesit personal, referuar kështu ish-kryeministrit Sali Berisha. Basha shtoi se e dinte që mbledhja e sotme do të degradonte në debat, ndërsa tha se qendra e debatit duhet të jetë skandali i inceneratorëve.
“Do të punoj çdo ditë për Partinë Demokratike, sa herë që t’i shërbej grupit të partisë Demokratike do të marr pjesë, jo kur t’i shërbej interesit personal. Një nga motivet e mia ka qenë diskutimi i lirë dhe jo personali. Sot vendosa të mos isha në një mbledhje që kishte të gjitha gjasat të degradonte në një konfrontim. Unë e kam të qartë, shumë të qartë rrugën që duhet të përshkojë Partia Demokratike, ujërat mund të jenë akoma të turbullta por do të qartësohen, nuk jemi në emision, por është aktuale, Është mishëruar një hap i parë për vjedhjen e shekullit, atë të inceneratorëve, nuk mund të mos shpreh keqardhjen time që këtij lajmi i mbivendosen zhvillimet e Partisë Demokratike, ky është një hap i parë që duhet përshëndetur, kulmoi me punën e Komisionit Hetimor për Inceneratorët, është e pamjaftueshme, ka një paketë qesharake që u afrohet shqiptarëve sot kur u janë marrë qindra miliona euro”, tha Basha.
Kujtojmë se, në mbledhjen e sotme të grupit parlamentar të PD, Lulzim Basha nuk ishte i pranishëm, ndërsa në takim ishte ish-kryeministri Berisha, pavarësisht kërkesës së Alibeaj se deputetët e përjashtuar nuk duhet të merrnin pjesë.
Discussion about this post