Ka dështuar sërish seanca mes deputetes së PD, Grida Duma dhe kryebashkiakut të Tiranës, Erion Veliaj, këtë herë për shkak të mungesës së prokurorit. Seanca e radhës është vendosur të zhvillohet më 14 tetor.
Në seancën e kaluar çështja kaloi për gjykim, pas mungesës së Veliajt, ndërsa Duma para dyerve të Gjykatës u shpreh se kryebashkiaku e ka të vështirë përballjen me të vërtetën.
“Nuk ka për t’u paraqitur, se përballja me të vërtetën e ka të vështirë. Do të vijojë nuk dhamë dakordësi për pajtimin. Ju bëj me dije se nuk është më çështja ime personale, herë pas here është politike. E vërteta duhet të kthehet në institucion. Gënjejmë, premtojnë, japim mashtrime dhe ia mpinë shqisat të gjithëve se çdo gjë e gënjeshtër fiton në këtë vend. Më takon mua të bëjë një betejë. Kjo betejë nis nga vlera e fjalës, vërtetësia e saj. Kur njeriu beson fjalën, vepron mbi atë. Ata që besojnë gënjeshtra, bëjnë veprimin e gabuar. Ata që kanë lindur në liri, e dinë peshën e saj”, tha Duma.
Kujtojmë se, në datën 24 mars 2021, Duma ka paditur në gjykatë Veliajn për shpifje ndaj saj. Duma u shpreh në një deklaratë për media asokohe se përgjimet e publikuara nga media, ku bënin pjesë anëtarët e klanit mafioz “Ndrnagheta”, konfirmojnë sipas saj, se Erion Veliaj dhe Edi Rama po e përdorin Tiranën si lavatriçe për paratë e pista, të mafias dhe krimit të organizuar, duke marrë 20 % të fitimit.
Veliaj përmes një reagimi zyrtar, theksoi se dëshirat e disa mafiozëve italianë për të bërë plane biznesi për Shqipërinë dhe dëshirat e PD-së që këto plane të jenë të vërteta, janë bashkuar në gojën e një trafikanteje të njohur apartamentesh. Deputetja i konsideroi akuzat e tij si shpifje të pabazuara dhe që nuk mund të argumentohen apo faktohen.
