Pas denoncimit të qytetarëve për moskryerjen e operacioneve të zemrës në Shërbimin e Kirurgjisë kardio-vaskulare në QSUT për shkak të mungesës së oksigjeneratorëve, ministrja e Shëndetësisë, Ogerta Manastirliu i është përgjigjur pyetjes ku pohon se po merren masat për t’i siguruar.
“Kemi marrë masa për materialet që kanë qenë dhe për të shtuar volumin të vijojë në shërbimin e kardiokirurgjisë. Numri i ndërhyrjeve është rritur krahasuar me një vit më parë me 30%, janë 847 ndërhyrje që janë kryer”, tha Manastirliu në një konferencë për mediat.
Lidhur me rastin e infektimit me HIV/AIDS të një fëmije 1 vjeç, Manastirliu theksoi se janë zbatuar protokollet mjekësore.
“Dua të them që ne kemi ndjeshmërinë maksimale për këtë rast. Kuptojmë dhe e ndiejmë. Ndaj reagimit të prindërve, jemi mirëkuptues, e përsëris ndjeshmërinë maksimale. Në ministri ne punën e bazojmë mbi ekspertizën e ekspertëve tanë. ISHP ka kryer hetimin epidemiologjik dhe e ka vlerësuar që në çdo hallkë të sistemit shëndetësor. Sipas ISHP janë zbatuar protokollet mjekësore”, u shpreh ministrja.
Ministrja Manastirliu gjatë analizës vjetore të punës për vitin 2022 tregoi edhe për investimet që do të kryhen gjatë 2023.
Discussion about this post