Ndaj Atletico Madrid shënoi golin vendimtar të fitores dhe të tetin këtë sezon me fanellën e Mallorcas.
Vedat Muriqi është njeriu i momentit në La Liga ku skuadra ishullore ka arritur të sigurojë suksesin e tretë rresht ndërsa për të po flasin përherë e më shumë.
Bomberi i Kosovës ka shënuar në të gjashta ndeshjet e fundit ndërsa këtë sezon numëron edhe 1 asist.
Moment vërtetë i artë për lojtarin që kaloi një kalvar të gjatë, fillimisht me refuzimin që i bëri Club Brugge dhe më pas me rikthimin te Mallorca ku u shit për 10 milionë euro. Saktësisht gjysma e shumës që u detyua ta transferonte Lazio nga Fenerbahce.
Që nga shkurti i këtij viti ai numëron 37 ndeshje me fanellën e Mallorcas me 18 gola dhe 6 asiste në total. Një gol çdo dy ndeshje, mesatare e frikshme për një lojtar që vetëm pak muaj më parë Lazio kërkonte ta largonte me çdo kusht.
Deklarata
“Në Turqi po kaloja shumë mirë por kur mora ofertë nga Lazio nuk isha i sigurt por duhej të provoja një eksperiencë të re. Fillova të dëmtohesha dhe gjërat nuk po shkonin mirë. Nuk ma dhanë asnjëherë mundësinë për të luajtur. Kalova dy vite shumë të vështirë të jetës time por pavarësisht kësaj me skuadrën ndihesha mirë. Flas ende me disa miq që kam si Milinkovic, Reina apo Marusic. Këta djem më kanë ndihmuar shumë. Tifozët dhe trajneri nuk më donin dhe kur shkoja në shtëpi isha shumë i trishtuar”, tha Muriqi.
Fillimisht brenda dy muajve u ndieva shumë më mirë fizikisht dhe mendërisht por sërish nuk po ia dilja mbanë dhe madje kishte momente kur nisa të dyshoja te aftësitë e mija. Mendoja se i kisha mbyllur llogaritë me futbollin. Mamaja dhe bashkëshortja më ndihmuan shumë. Në janar vendosa të shkoja te Mallorca dhe kjo më ndryshoi jetën”, shtoi ai.
Discussion about this post