Besnik Mustafaj, ish-ministër i Jashtëm dhe ish-deputet, tha se Kryeministri Edi Rama po përpiqet të marrë rolin e protagonistit me Procesin e Berlinit, që nuk arriti ta marrë me nismën e “Open Balkan”.
Në studion e News24, duke komentuar turin e takimeve të Ramës me liderët e Ballkanit dhe mesazhet drejtuar Albin Kurtit, Mustafaj tha se përmendja e kanunit nuk është normale, pasi vetë Edi Rama kur erdhi Presidentja e Kosovës në Tiranë, nuk e mirëpriti Vjosa Osmanin.
“Sjellja e Albin Kurtit sot në Prishtinë nuk është e diplomatike dhe as e një burri shteti. Në anën tjetër, Shqipëria është vend mikpritës i Samitit të Berlinit, por nuk e drejton Shqipëria, pasi kjo është një nismë e kancelares Angela Merkel kur ishte në pushtet, por më pas u mbështet edhe nga Franca, dhe gjithçka është nën ombrellën e Bashkimit Europian”, tha Mustafaj. Sipas tij, sjellja e Ramës me “Procesin e Berlinit” është populliste, por sjellje të tilla nuk japin rezultate.
“Edi Rama e ka trajtuar Albin Kurtin si të paditur, e ka trajtuar gjithmonë keq. Rama është munduar ta poshtërojë Kurtin, ndërsa Kryeministrit të Kosovës, iu dha rasti edhe iu përgjigj me të njëjtën monedhë, edhe pse mendoj se është e gabuar. Gjithsesi Kurti sot duhej ta priste Ramën, edhe pse mund të mos kishte asgjë me rëndësi për të biseduar me të”, tha Mustafaj.
Ndërsa e konsideroi Osmanin si më diplomate dhe më të zgjuar se dy kryeministrat, Mustafaj tha se “Presidentja e Kosovës nuk ia mbylli derën Edi Ramës, e priti, ndërsa Albin Kurti tregoi një kokëfortësi të panevojshme”, tha Mustafaj.
Discussion about this post