Muzikë nga ora 11:00 deri në mesnatë, gjoba të majme përtej këtyre orare / Ja çfarë propozohet

Muzika në zonat e banuara dhe ato turistike do të lejohet vetëm nga ora 11:00 e deri në mesnatë, me kushtin që të respektohet një kufi i caktuar volumi.

Projektligji “Për vlerësimin dhe administrimin e zhurmës në mjedis”, i cili mori edhe “dritën jeshile” në Komisionin për Veprimtarinë Prodhuese parashikon gjoba 10-fish më të larta se ligji aktual për ndotësit akustikë.

“Nuk bëhet absolutisht fjalë për të cenuar veprimtaritë ekonomike të subjekteve private, ahti siç nuk është spak qëllimi për të cenuar qetësinë e pushuesve”, u shpreh zv/ministrja Bello.

Baza e re ligjore ngarkon direkt me përgjegjësi Policinë e Shtetit për kontrollin dhe gjobitjen e subjekteve, ndërsa bashkitë do duhet që të përcaktojnë hartën e zonave ku lejohet apo jo muzika.

“Kjo padiskutim kërkon një auto-edukim në radhë të parë, kërkon dhe forcën e ligjit në radhë të dytë. Duhet ta bëjmë të qartë se këtu bëhet fjalë vetëm për muzikën, por siç edhe zoti Mziu tha për gjeneratorët që me gjasa nuk do të ekzistojnë më, ne kemi marmita motorësh që tronditin shtëpitë si të ishte tërmet dhe duhet ta pranojmë që ende i kemi”, deklaroi kreu i Komisionit për Veprimtarinë Prodhuese, Arben Pëllumbi.

Por për përfaqësues të bareve dhe restoranteve, të cilat do të jenë veçanërisht në lupën e task forcës së posaçme, baza e re ligjore nuk e zgjidh problemin e vjetër me zhurmat.

“Kemi dy vite që e  kërkojmë këtë ligj. Por duhet një hartë se ku lejohet e ku jo muzika. Dhërmiu është një qytet i krijuar nga jeta e natës dhe tani në Dhërmi nuk ka më jetë nate” , tha kreu i shoqatës së bareve, Enri Jahaj.

Kreu i Shoqatës së Barave dhe Restoranteve, Enri Jahaj madje paralajmëron edhe selektivitet në gjobitje.

“Absolutisht besoj se do të ketë selektivitet. Do të bëhet një lloj reprezalje ndaj asaj pak jete të natës që u ka mbetur qyteteve”, shtoi Jahaj.

Referuar raportit “Mushkëri të gjelbra për qytetet tona, 2021”, mbi gjysmë milion qytetarë të Republikës së Shqipërisë jetojnë çdo ditë nën ekspozimin dhe ndikimet e zhurmave.

Baza e re ligjore pritet të kalojë në parlament brenda këtij sesioni Parlamentar për të hyrë më pas në fuqi pas botimit në Fletoren Zyrtare.(A2)