Myrto Uzuni hyn në histori! Sulmuesi i Kombëtares shqiptare është tani golashënuesi më i mirë i huaj në historinë e klubit spanjoll Granada. Me golin e tij të 45-të, Uzuni theu rekordin e mëparshëm të mbajtur nga El-Arabi, i cili kishte realizuar 44 gola.
Gjatë ndeshjes kundër kryesuesve të Racing Santander, Uzuni nuk u ndal me kaq dhe arriti kuotën e 46 golave, pasi shënoi dy herë në fitoren e thellë 3-0.
Në këtë kampionat, sulmuesi kuqezi numëron tashmë 11 gola. Një moment i jashtëzakonshëm dhe historik në karrierën futbollistike të Myrto Uzunit. Federata e Futbollit i uron Uzunit suksese të tjera në rrugëtimin e tij të shkëlqyer.
Për këtë arritje historike të beratasit, reagoi edhe presidenti i Federatës Shqiptare të Futbollit, Armand Duka.
“Kënaqësi të shohësh se si lojtarë të Kombëtares tonë të futen në historinë e klubeve të huaja. Myrto Uzuni, tani autor i 46 golave me fanellën e Granadës, ka vendosur një rekord të ri për klubin spanjoll si shënuesi më i mirë i huaj. Urime Myrto, uroj të vazhdoni të shënoni gola të tjerë të rëndësishëm me Granadën dhe me Kombëtaren”, shkruhet në postimin e Dukës.
Discussion about this post