Jo vetëm eksponentë të PD-së së drejtuar nga Sali Berisha, por edhe deputetë të rreshtuar në atë që njihet si grupimi i Gazment Bardhit në PD, kanë reaguar pas deklaratave të Lulzim Bashës, i cili ka thyer heshtjen lidhur me zhvillimet politike në vend, pas më shumë se 5 muajsh.
E ndërsa sulmoi grupimin e Berishës por edhe atë të Bardhit, Basha tha se nuk ka “fjetur gjumë” sikundër e tall Edi Rama, por ka zhvilluar plot 250 takime me demokratët për të lidhur telat, sikundër u shpreh ai, që ishin këputur.
Por duket se deklaratat e Bashës, në disa raste janë pritur me humor, dhe në të tjera janë marrë me pak seriozitet.
Deputeti demokrat Agron Gjekmarkaj në reagimin e tij ka ironizuar Lulzim Bashën, të cilin sikundër vetë e pohoi e njohin si kryetar të PD-së institucionet e shtetit, pra ata që ku më shumë e ku më pak, kontrollohen nga Edi Rama.
“Na argëtoi qerratai, na kishte marrë malli”, shkruan Gjekmarkaj, ndërsa shton se nuk dinte çfarë thoshte shpesh, pasi të gjallët i vdiq dhe të vdekurit i ktheu përmbys.
“Një konferencë shtypi me një protagonist që për një çast na shkëputi nga realiteti. Na argëtoi qerratai. Na kishte marrë malli. E kerkonim në emisionet televizive për njerëzit e humbur dhe ja ku u shfaq.
Qeshte, bënte grimasa, mërzitej, qeshte prapë. Nuk thoshte asgjë në rastin me të mirë, nuk dinte çfarë thoshte shpesh. Të gjallët i vdiq, të vdekurit i ktheu përmbys. Të dhimbsej në vetëposhtërimin e tij si shërbëtor i marrë peng nga ambicia e tij për të mbetur dikush kur gjithmonë ka qenë askush. Shaka e fatit qe kërkon reflektim të thellë që lideri nuk klonohet, nuk rritet ne epruvete nuk zgjidhet për mungesën e cilësive!
E kundërta do na e kishte shmangur këtë keqardhje për një investim të rreme që kemi bërë në shumë vite. I la të zhgënjyer të gjithë! Ata që po e përdorin për cilësinë e ulet të aktrimit po kaq ata që prisnin një vrasje ndërgjegjeje apo pak ndjenjë turpi për kohën, mundin sakrificat, shpresat që ju vrau me kotësinë e tij gjenetike! Një gjë ra ne sy që nuk kishte ndryshuar paaftësia për t’u skuqur apo zverdhur!”, shprehet Gjekmarkaj.
Discussion about this post