Banorët e komunitetit Romë në fshatin Moravë të Beratit, janë lënë në harresë. Përmbytjet si pasojë e mungesës së argjinaturës dhe kanaleve parësore apo pritave, u kanë shkaktuar dëme jo të pakta në ekonomi. Ndërsa qeveria nuk ka marrë asnjë masë, duke i lënë në mëshirë të fatit.
Burime për gijotina.com bëjnë me dije se mbi 200 familje banues në këtë fshat nuk kanë marrë asnjëherë dëmshpërblim për dëmet e shkaktuara, në tokat e bujqësore, me prodhimet e të cilave do të siguronin të ardhura për stinën e dimrit. Vetë banorët shprehen se janë përmbytur dhjetëra herë brenda tre vitesh dhe se për ta nuk do t’ja dijë. Në këto kushte, kur qeveria ka në dorë pushtetin dhe lë pas detyrimet e popullit, pas përmbytjeve banorët romë kanë jetuar duke mbledhur kanaçe. Ata theksojnë se qeveritarët kujtohen vetëm kur kanë zgjedhje.
Familjet Rome pohojnë se, toka dhe të mbjellat janë e vetmja mënyrë jetese për ta, por edhe këto toka kanë dy vjet që nuk i mbjellin më nga frika e përmbytjeve.
“Pas përmbytjeve që na kanë shkaktuar mjaft dëme ekonomike, ne jemi detyruar të mbledhim kanaçe e plastikë për të jetuar e për të ushqyer fëmijët pasi askush nuk i kthen sytë nga komuniteti jonë, për ne kujtohen vetëm kur ka votime”, shprehen banorët.
Ata i bëjnë apel për ndihmë shtetit, që të marrin dëmshpërblimet e përmbytjeve dhe jo premtimet, pasi çdo vit të mbjellat e tyre i ka marrë lumi.
Megjithëse nuk janë të sigurt nëse do të ketë reshje apo prurje nga lumi Osum, ka edhe nga ata banorë që sërish vazhdojnë të punojnë tokat e tyre duke u lutur mos ketë përmbytje këtë vit.
