Futbollisti i Uruguajit Edinson Cavani është ende i inatosur për eliminimin e skuadrës së tij nga Kampionati Botëror “Katar 2022”. Ai sulmoi ashpër Daniel Siebert, arbitrin që drejtoi ndeshjen mes Uruguajit dhe Ganës në fazën e grupeve.
Ekipi i trajnerit të atëhershëm Diego Alonso arriti të fitojë 2-0 ndaj Ganës në ndeshjen e fundit në grup, por u eliminua nga suksesi i Koresë së Jugut ndaj Portugalisë. Gjyqtari Siebert u kontestua shumë nga amerikano-jugorët, veçanërisht për mosakordimin e dy penalltive, pavarësisht përdorimit të VAR.
“Matador” doli i tërbuar dhe para se të shkonte në dhomat e zhveshjes shkatërroi monitorin e VAR-it. Për atë gjest, Komisioni Disiplinor i FIFA-s ka hapur një dosje. Duke folur për “Cadena Ser”, ish-lojtari i Palermos dhe Napolit në Serie A e drejtoi gishtin sërish nga Sieberti:
“Nëse më sanksionojnë se kam goditur VAR-in, atëherë për eliminimin tonë nga Kupa e Botës duhet të arrestojnë arbitrin Sieberti. Këto janë gabime që nuk mund t’i bësh me VAR, me të gjitha kamerat dhe arbitrat pas.”
Discussion about this post