Deputetë të opozitës në komisionin e ekonomisë shprehën shqetësim për çmimet që i vlerësuan të kripura të duopolit të kompanive të telefonisë celulare, “Vodalone” dhe “One”. Kritika mori kreu i Autoritetit të Konkurrencës Denar Biba lidhur me mungesën e hetimeve sipas deputetëve nga AK, teksa ligjëvësit ngritën pikëpyetje nëse ka një marrëveshje të fshehtë mes dy kompanive celulare.
Deputetja demokrate Emilia Koliqi solli një përvojë personale, teksa tregoi se si një prej kompanive celulare (pa e specifikuar) i rriti në mënyrë të njëanshme faturën për shërbimin e ofruar.
“Paketat bazë janë me çmime të rritura dhe sipas të dhënave të institucioneve ndërkombëtare të cituara nga AKEP rezultojnë me rritje në vitin 2023 krahasuar me 2022 dhe në nivel më të lartë se mesatarja botërore për vitin 2023”, tha deputetja Koliqi, duke cituar të dhënat nga Autoriteti i Komunikimeve Elektronike dhe Postare.
I pranishëm në komisionin parlamentar ku foli lidhur me raportin vjetor për vitin 2023 të institucionit që drejton, Denar Biba përmendi rastin e ONE vitin e kaluar, kur operatori ndërpreu shërbimin për disa ditë më radhë për klientët e tij. Biba tha se në atë rast kompania humbi klientë për shkak të problemeve teknike të saja dhe u konkludua se situata nuk përbën objekt hetimit.
Shqetësim për çmimet e kripura të kompanive celulare ngritën edhe deputetët Arbi Agalliu e Dashamir Shehi. Ky i fundit teksa rekomandoi se Konkurrenca duhet të përqendrohet te hetimi i tregut të karburanteve dhe telefonisë celulare tha se “na i marrim pak si fshehtas lekët”.
Në përgjigje, Denar Biba tha se AK nuk ka tagër të vendosjes së çmimeve, por vetëm të hetojë nëse ka shkelje të konkurrencës. “S’jemi autoritetet i vendosjes së çmimeve, çmimet miratohen nga rregullatori përkatës, nëse ka çmime të larta por ka konkurrencë misioni është i kryer, këtë mision na keni dhënë, ndryshoni ligjin dhe shihni ç’mund të bëjë ky autoritet”, tha ai.
Gjatë fjalës së tij, vuri në dukje se “s’kemi marrëdhënie të shkëlqyer me AKEP”.
Discussion about this post