Avokatja Brunilda Lika ka qenë e pranishme në ambientet e Gjykatës së Apelit në Tiranë në momentin kur gjyqtari Astrit Kalaja u qëllua për vdekje brenda sallës së gjyqit. Teksa mori pjesë në homazhet për gjyqtarin, ajo ndau me mediat tronditjen dhe kaosin që përfshiu stafin dhe të pranishmit pas ngjarjes.
“Isha në Gjykatën e Apelit. Të humbasë jetën një gjyqtar në krye të detyrës, teksa jep një vendim për Republikën e Shqipërisë, është një akt i paprecedentë”, tha Lika.
Avokatja tregoi se menjëherë pas krismave, të gjithë u përfshinë nga paniku: “U grumbulluam në një hapësirë ku ne avokatët mblidhemi zakonisht. Nuk pash asgjë, sepse situata ishte tronditëse. Gjendja ishte kaotike dhe e frikshme.”
Ajo shtoi se nuk ndodhej brenda sallës ku ndodhi vrasja, por dëgjoi zhurmat dhe pa panikun që përfshiu të gjithë ambientet e gjykatës. “Kur ndodhi kjo gjë, na kap paniku. Është akt i paprecedentë – vrasja e një gjyqtari brenda sallës së gjyqit.”
Ngjarja tragjike që ndodhi më 6 tetor në zemër të sistemit të drejtësisë ka tronditur opinionin publik dhe ka ngritur pikëpyetje të forta mbi sigurinë në ambientet e gjykatave.
Discussion about this post