Ashtu sikur kishin paralajmëruar, banorët e Rinasit kanë përshkallëzuar protestën ditën e sotme. Ata kanë bllokuar rrethrrotullimin pranë aeroportit të Rinasit, duke e përshkallëzuar kështu protestën dhe duke krijuar më tepër problematikë në qarkullim. Ata kërkojnë që ARRSH të ndryshojë vendimin për kthimin e kësaj rruge me një sens lëvizje pasi ka penalizuar jetën e përditshme dhe nevojat e tyre bazike për të aksesuar shkollat, qendrat shëndetësore apo tokat bujqësore.
“Nuk kërkojmë luks, kërkojmë të lëvizim brenda për brenda fshatit. Me dalë nga shtëpia me çuar kalamajtë në shkollë, nuk shkoj dot. Çdo ditë do dalim në rrugë deri sa të na gjejnë zgjidhje. Nuk shkojmë dot tek tokat tona, prindërit tonë nuk shkojnë dot të bëjnë një gjilpërë në ambulancë. Kërkojmë të lëvizim brenda për brenda fshatit”, shprehet një prej protestuesve. Ndërsa të vendosur shprehen se nuk do të largohen nga rruga pa marrë një zgjidhje, madje paralajmërojnë se ditën e nesërme protesta do të jetë edhe më e madhe, pasi pasdite do t’u bashkohen edhe banorë të zonave të tjera.
Discussion about this post