Mbi 2000 banorë në qytezën e Milotit në Bashkinë Kurbin vuajnë për ujë të pijshëm prej shumë vjetësh. Ata tregojnë në medie se uji mungon në çezma për ditë të tëra, ndërsa kjo situatë është e vazhdueshme si në verë ashtu dhe në vjeshtë. Për të pirë mbushin në një burim natyror, por nevojat e këtyre konsumatorëve që paguajnë faturat janë disa herë më të mëdha.
“Po si nuk është problem se nuk kemi me çfarë të lahemi se këtë ujë që po mbush e përdor për të pirë. Me çfarë thonë është shteruar uji nuk e thithin pompat e ujësjellësit, ndërsa ky uji këtu është burim i hershëm ku kanë mbushur të parët tonë me bolira (enë druri)”, tha një banor.
Një banorë thotë se është ankuar në bashki po atje justifikojnë se është prishur pompa. I revoltuar ai tha se kjo është tallje sepse ata paguajnë taksa për këto shërbime.
“Na thonë është prish pompa jo është ul niveli, po ç’na duhet ne. Po të dojë shteti vjen e vë pompën e re. Shkoj e mbush me karrocë në një përrua“, tha një tjetër banor i Milotit.
Bashkia e Kurbinit që ka për detyrë furnizimin me ujë të pijshëm nuk i përgjigjet shqetësimit të banorëve, ndërsa i kontaktuar në telefon administratori i njësisë vendore të Milotit Dritan Preçi thotë se problematika ka ardhur si pasojë e thatësirës së tejzgjatur.
