Nadir Çausholli është një i dënuar për mashtrim me fondet e FSDKSH, por vazhdon fiton miliona lekë nga tenderat publikë prej strukturave shëndetësore. Shpesh paraqet ofertën më të lartë, por në fund ia del të marrë paratë. Si është e mundur? Kryebashkiaku Erion Veliaj e ricikloi dhe tashmë biznesmeni nuk ndalet, por ka arritur xhiron vjetore afro 50 milionë euro.
Dy tenderat e fundit
Pak ditë më parë, “CFO Pharma”, që kontrollohet nga Nadir Çausholli, u shpall fituese e një tenderi me vlerë 30 milionë lekë të vjetra nga Drejtoria e Kujdesit Shëndetësor në Shkodër. Më herët u skualifikuan tri kompani që kishin paraqitur oferta më të ulta.
Kjo skemë u përdor edhe në Spitalin Rajonal Durrës. Kjo njësi shpalli më 25 Gusht 2022 prokurimin për “Blerje pajisje mjekësore për sallën e Urgjencës”, me fond limit 62 milionë lekë të vjetra. Në tender rezulton se morën pjesë 3 operatorë ekonomikë. “CFO Pharma” është shpallur fituese e tenderit, megjithëse kishte edhe një kompani tjetër me ofertën më të ultë.
Kompania “Oest Distrimed” kishte ofruar 57,2 milionë lekë, ndërsa Nadir Çausholli ka propozuar 5999999 lekë për blerjen e pajisjeve. Gjithsesi, kur fituesi është i paracaktuar, ofertat janë formale.
Në përfundim, “CFO Pharma” fitoi tendering me ofertën 60 milionë lekë të vjetra, ose rreth 2 milionë lekë më pak se sa fondi limit.
Theksojmë se në të dy rastet tenderët janë shënuar nga Open Data me “Flamur të kuq” për mundësi abuzimi.
Gjykata ia ndaloi, Çausholli vazhdoi me tenderat
CFO PHARMA është emër që maskon të kaluarën e errët të Nadir Çaushollit, ndërsa më parë quhej “Omega Pharma Group”.
Kjo kompania rezulton e ndaluar me vendim të Gjykatës së Tiranës që të tregtojë ilaçe të rimbursueshme për 3 vjet. Megjithatë ia ka dalë që të aktivizojë një kontratë me Fondin e Sigurimit të Detyrueshëm të Kujdesit Shëndetësor vetëm pak muaj pas dënimit, pasi e transferoi kompaninë nën ombrellën e një marke të re.
Ish-pronari i Omega Pharma Group, Fatos Çausholli (babai i Nadirit) ka aktivizuar një kontratë me Fondin në vitin 2017 në cilësinë e administratorit të një kompanie të re të quajtur “CFO Pharma”.
Veliaj, mik i Çaushollit
Pasi i hoqi licencën biznesmenit Ferdinand Ibrahimi që menaxhonte linjën e “Unazës”, Bashkia e Tiranës ka liçensuar çuditërisht Nadir Çaushollin si pronarin e ri të kompanisë së transportit urban. Nga ilaçet kërceu tek autobusët jeshilë. Kështu paraja shtoi paranë përmes abuzimeve të ndihmuara nga kryebashkiaku.
Mashtrimi 2 milionë euro i Nadir Çaushollit
Nadir Çausholli bëri bujë në vitin 2015 kur pas një hetimi disamujor prokuroria zbuloi skandalin e mashtrimit me recetat false për barnat e rimbursueshëm, specifikisht për ilaçin “ketosteril”, përmes të cilit iu zhvatën shtetin shqiptar 2 milionë euro. Në fillim të vitit 2016, gjykata e gjeti fajtor Nadir Çaushollin për veprat penale “mashtrim” dhe “falsifikim dokumentesh” duke i dhënë 5 vjet burg. Por, për shkak se ai pranoi gjykimin e shkurtuar, gjykata i uli 1/3 të dënimit, i cili më pas u konvertua në shërbim prove.
Çausholli doli nga qelia në tetor të vitit 2016 dhe tashmë me maskë të re, duke i ndërruar emrin kompanisë nga “Omega Pharma” në “CFO Pharma” vijoi të kishte marrëveshje me Fondin e Sigurimit të Detyrueshëm të Kujdesit Shëndetësor duke përfituar miliona nga paratë e shqiptarëve.
Dy rastet e fundit të tenderave korruptivë të “CFO Pharma” janë së bashku 90 milionë lekë që xhirohen në arkën e kompanisë mashtruese. Për Çaushollin këto janë një pikë ujë para aferave që ka kryer më parë, por për SPAK-n janë indicie të mjaftueshme për hetim.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post