Deputetja demokrate Jorida Tabaku ka sulmuar qeverinë pasi çmimi i naftës ka arritur në 250 lekë për litër kur në të gjithë rajonin dhe në bursa ka pësuar ulje të ndjeshme.
Sipas Tabakut, krijimi i bordeve është bërë për të ndarë pazaret në kurriz të konsumatorëve ndërsa shton se qeveria duhet të ndërhynte në forma subvencionesh apo reduktimin e taksave për të ulur çmimin e naftës, por nuk e bëri.
“Nafta që paguani sot është prej qeverisë edhe më e shtrenjtë. Rritja e çmimit të karburantit në 250 lekë për litër kur në të gjithë rajonin dhe në çdo bursë është ulur është kriminale dhe me pasoja për ekonominë! Krijimi i bordeve me përfaqësues të biznesit dhe qeverisë është thjesht një ndarje pazaresh në tavolinë në kurriz të konsumatorëve dhe biznesve. Shteti, mund dhe duhet të ndërhynte në forma subvencionesh apo reduktimin e taksave për të ulur çmimin e naftës. Qeveria mund të ndërhynte dhe kishte gjithë të drejtën për të goditur monopolet edhe oligopolet, mund të kontrollonte edhe mbikëqyrte tregun dhe marrëveshjet e fshehta, por, në fakt ajo zgjodhi rrugën më të shkurtër dhe në disfavor të xhepave të shqiptarëve. Qeveria futi në një bord oligopolet, monopolet dhe i dha atyre dorën e lirë të rishikonin çmimet përmes një bordi alla komunist. Edhe kur ne folëm kundër logjikës së bordeve por edhe rishikimit të politikave sidomos duke parë ngjarjet në Ukrainë dhe sanksionet por edhe goditjet që po pëson tregu i naftës sërishmi qeveria nuk reagoi. Edhe kur çmimet po rriten me katër fish sërish qeveria nuk reagon por bën veshin e shurdhër dhe shkon më tej të rrisë taksat. Sot jemi në kushtet kur çmimi i naftës po kap majat, u bënë muaj që çmimi nuk ka zbritur poshtë 200 lekë/litër. Çfarë mund të bënte ndryshe qeveria? Qeveria mund të subvenciononte çmimet e disa produkteve, mund të mbështeste shtresat më të prekura nga rritja e çmimit, përmes politikave subvencionuese”, deklaroi Tabaku.
Discussion about this post