Inspektorati Shtetëror Teknik Industrial ka inspektuar subjektet e tregtimit me shumicë dhe pakicë të karburanteve dhe të lëndëve djegëse, pajisjeve nën presion dhe instalimeve elektrike për gjobat e lëna në fuqi nga komisioni i shqyrtimit të kundëravajtjeve administrative të mbajtura në muajin Gusht 2021
Nga inspektimet e bëra nga Inspektorati Shtetëror Teknik dhe Industrial nga komisioni i mbajtur në muajin Gusht 2021 janë ndëshkuar administrativisht me gjobë 3 subjekte. Gjobës nuk i ka shpëtuar as Bankers Petroleum, pasi gjatë muajit gusht rezulton të jenë marrë dy masa ndaj saj. Ato kapin vlerën e 4.2 milionë lekëve dhe sipas Inspektorati Shtetëror, shkak është bërë mosrespektimi i normave dhe kushteve teknike. Kjo kompani është konstatuar se ka vendosur në punë pajisje nën presion pa projekt teknik.
Fokusi i kontrolleve të kryera ishte zbatimi i dispozitave të ligjit nr.8450 datë 24.02.1999 “Për përpunimin, transportimin dhe tregtimin e naftës, të gazit dhe nënprodukteve të tyre”, ligji nr.32/2016 datë 24.03.2016 “Për garantimin e sigurisë së punës së pajisjeve/instalimeve nën presion” si dhe VKM nr.212, datë 16.03.2016 “Për përcaktimin e kushteve dhe të rregullave teknike për përpunimin e bombolave të mbushura me gaz të lëngshëm të naftës (GLN)” dhe ligji nr. 8734, datë 01.02.2001 “Për garantimin e sigurisë se punës te pajisjeve dhe instalimeve elektrike”, i ndryshuar.
51 subjekte janë gjobitur në 8 muajt e parë të vitit nga Inspektorati Shtetëror Teknik Industrial pasi gjatë inspektimeve të kryera janë konstatuar se nuk përmbushin standardet e kërkuara. Fatura e gjobave kap shifrën e 17.3 milionë lekëve.
