Ish-punonjësit e Kombinatit të Përpunimit të Naftës në Ballsh kanë dalë sërish në protest përpara dyerve të uzinës.Protesta e ditës së sotme, sipas tyre vjen pasi janë sinjalizuar se rafineria e Ballshit do të çmontohet dhe do të shkojë për skrap.Ata janë shprehur se nuk do të lejojnë që kjo të ndodhë, teksa theksojnë se nëse nuk likuidohen të gjithë me pagat e prapambetura, planet për rafinerinë do të zbatohen vetëm nëse shkelin mbi trupat e tyre.
Ndonëse ministrja e Infrastrukturës, Belinda Balluku deklaroi disa ditë më parë se naftëtarët do të paguhen me 30 mijë lekë në muaj edhe për dy vitet në vijim, naftëtarët shprehen mosbesues derisa ky premtim i Ballukut të zbardhet në Fletoren Zyrtare.
“Deri sa të shlyhen një më një naftëtarët, nuk shkel njeri këtu, vetëm mbi trupin tonë futen këtu. Boll kemi bërë negociata. Nëse duan që palët të zhdukin gjurmët e krimit, të bëjnë hesapet e tyre. Deri sa të likujdohen të gjithë naftëtarët, kjo rafineri do bëhet skrap nga ata dhe jo nga të tjerët. Jemi informuar që ka kaluar një mbështetje financiare, nuk është zbardhur asgjë në fletoren zyrtare, por ne jemi të shqetësuar nga disa zëra që qarkullojnë. Kjo rafineri është e naftëtarëve. Kemi ndenjur pa u paguar për 13 muaj. Me pak investime, kjo rafineri kthehet në punë, pse nuk e vënë në punë?”, thotë Sokol Dautaj, kreu i sindikatës së naftëtarëve.
Naftëtarët shprehen se kërkojnë rikthimin në funksion të rafinerisë, pasi nuk duan t’i rëndojnë buxhetit, teksa theksojnë se nuk janë për lëmoshë.
“Ne jemi shprehur shumë qartë, ne nuk jemi për lëmoshë, nuk duam t’i rëndojmë buxhetit të shtetit, duam që rafineria të rikthehet në punë”, thekson Dautaj.
Naftëtarët e Ballshit morën në tetor rrogën e fundit nga marrëveshja 1-vjeçare me kryeministrin Rama, i cili iu premtoi se rafineria do të vihej sërish në punë, gjë e cila nuk po ndodh.
Discussion about this post