Naftëtarët e Ballshit kanë dalë sot në protestë, ku edhe janë përplasur me rojet e sigurisë. Përmes një kërkese kreu i Sindikatës, Sokol Dautaj, ka deklaruar se prej disa ditësh një kompani private e paautorizuar ka filluar punimet brenda në rafineri, duke penguar punimet e tyre. Ai shprehet se kjo ndërhyrje pa marrë më parë asnjë leje po i dëmton shumë ata dhe duket hapur se po abuzohet me vlerat që ka rafineria.
“Pa asnjë njoftim mbi shitjen apo blerjen e asetit, në mënyrë provokative ka filluar punimet një kompani private në rafineri. Ne si sindikatë komfort ligjit po ju vëmë në dijeni për këtë situatë të krijuar. Ne kërkojmë që të mos ketë ndërhyrje deri në vendim zyrtar”, u shpreh ai.
Sakaq, ai ka deklaruar se si sindikatë kanë kërkuar zgjedhje ligjore nga qeveria në mënyrë që ata të fillojnë tamam punën në rafineri, ndërsa ngriti sërish shqetësimin për mos marrjen e pagave nga disa punonjës.
“Ne kemi pritur një zgjidhje ligjore. Nuk kanë pse të na provokojnë në këtë lloj mënyre. Ne kemi kërkuar që rafineria të vihet në punë dhe ne të punësohemi të vijojmë punën tonë aty. Gjithsesi nëse shteti e vendos ndryshe të paktën të dalë në një njoftim zyrtar dhe të thotë që rafineria nuk do të vihet më në punë. Por gjithashtu të gjejë një zgjidhje mbi problemin e pagave të pa marra. Nuk dimë as se kush i drejton forcat e policisë, ja ku i keni pyetini. Kanë ardhur këtu dhe një kompani private ka nisur punimet”, tha Dautaj ndër të tjera.
Sakaq, ata e konsiderojnë ndërhyrjen në rafineri nga kompania private si provokim, prandaj edhe paralajmërojnë se do të ketë incidente, ndërsa as sot nuk ka munguar përplasja mes tyre dhe rojeve të sigurisë.
Discussion about this post