Naim Murseli u arrestua nga policia e Kosovës disa orë pas varrimit të bashkëshortes së tij, Liridona Murselit, e cila mbeti e vrarë mbrëmjen e së mërkurës pas një sulmi me armë.
Fillimisht u raportua se vrasja kishte ndodhur nga grabitës të maskuar, që pasi i kishin marrë telefonat, para dhe bizhutë, kishin qëlluar ndaj Liridonës.
Naimi dhe Liridona kishin dy fëmijë, ndërsa krimi ndodhi pikërisht në sy të të miturve.
Por hetimet zbuluan se vrasja ishte e organizuar nga Naimi, i cili i kishte premtuar Granit Plavës 30 mijë euro për kryerjen e krimit.
Ndërsa ende nuk dihen motivet që qëndrojnë pas vrasjes së nënës së dy fëmijëve, ajo që shihet në profilin e Naim Murselit në Facebook, është një jetë aktive në rrjetet sociale.
Fotot dhe urimet për bashkëshorten nuk mungojnë, e madje në një prej ditëlindjeve të saj ai i “uron edhe 100 vite”, ndërkohë që do të ishte vetë ai që do t’ia merrte jetën në një moshë fare të re.
Në profilin e tij në facebook, Murseli për shkak edhe të angazhimit pranë njeriut më të pasur të Kosovës, ka hedhur foto me personalitete nga më të ndryshme politike dhe jo vetëm. Murseli ka publikuar fotografi me kryeministrin e Shqipërisë, Edi Rama, kryeministrin e Kosovës, Albin Kurti, Presidenten Vjosa Osmani.
Nurseli ka publikuar foto edhe me artistë me famë botërore si Rita Ora dhe Dua Lipa.
Me një shikim të shkurtër në profilin e tij në “facebook”, shihen fotografitë e shumta që Murseli ka publikuar nga jetesa luksoze që ka bërë, në Suedi, por edhe në udhëtime të ndryshme bashkë me Pacollin.
Të shumta janë edhe fotografitë e tij me gruan, Liridonën, e cila është varrosur sot në fshatin e tij të lindjes në Gjakovë dhe Murseli ishte një nga ata që priste dhe përcillte për ngushëllime njerëz të shumtë.
Ngjarja makabre të kujton rastin e pilotit grek, Babis i cili vrau bashkëshorten e tij 20-vjeçare dhe e inskenoi si grabitje. Ngjarja e rëndë u regjistrua në maj të vitit 2021 dhe u zbulua nga hetuesit rreth një muaj më vonë.
“Grabitja” e stisur në Prishtinë ndërkohë zgjati vetëm pak më shumë se 24 orë dhe pas ceremonisë mortore ndaj nënës së fëmijëve të vet, Naim Murseli shkoi në qelitë e burgut. Ndërsa piloti grek kishte një lidhje paralele dashurie, për Murselin ende nuk dihet se çfarë qëndron pas aktit makabër që ndërmori.
Më herët gjatë ditës së sotme babai i Naim Murselit , Shaban Murseli në një rrëfim ekskluziv për emisionin “Me zemër të hapur” në News24 të moderatores Evis Ahmeti tha se gjendja e të birit ishte e rëndë dhe se ky i fundit është larguar nga makina për të shpëtuar fëmijët.
Discussion about this post