Tajfuni Nanmadol ka goditur ishullin Kyushu në qytetin jugor Kagoshima të Japonisë. Mediat theksojnë se ka humbur jetën një person si pasojë e stuhisë së fuqishme. Gjithashtu 50 të tjerë janë të plagosur dhe ka patur dëme të shumta materiale. Ndërsa nga ana e autoriteteve përkatëse bëhet me dije se erërat arritën një shpejtësi maksimale deri në 252 kilometra në orë. Agjencia Meteorologjike e Japonisë lëshoi një paralajmërim të nivelit 5 kundër tajfunit që goditi jugun e vendit.
Alarmi i nivelit 5 është më i larti në shkallën e paralajmërimit të fatkeqësive. “Një tajfun shumë i fortë mund të shkaktojë atë lloj fatkeqësie që shihet vetëm një herë në disa dekada”, raportuan mediat, duke cituar zyrtarët e motit.
Ndërkohë Japonia paralajmëroi gati dy milionë njerëz që të evakuohen për shkak të rrezikut të përmbytjeve dhe rrëshqitjeve të dheut.
“Kryeministri japonez Fumio Kishida, i cili ishte planifikuar të nisej sot për në Nju Jork për të marrë pjesë në Asamblenë e Përgjithshme të OKB-së, do të vonojë udhëtimin e tij me një ditë për të vlerësuar dëmet e shkaktuara nga stuhia,” – tha zyra e tij. Një situatë e vështirë u regjistrua edhe në jugperëndim të Porto Rikos të dielën ku si pasojë e Uraganit Fiona u shkaktuan rrëshqitje dheu, ndërprerje të energjisë elektrike dhe dëmtim të rrugëve. Qindra njerëz u evakuuan ose u shpëtuan në të gjithë ishullin, ndërsa lumenjtë dolën nga shtrati dhe përmbytën makinat, shtëpitë që ishin në katet e para, shkatërruan ura madje edhe një pistë aeroporti në rajonin jugor të ishullit. “Dëmet që po shohim janë katastrofike”, tha guvernatori Pedro Pierluisi.
Discussion about this post