Besimtarët muslimanë ashtu si dhe të gjithë amatorët e kulturës e dijeve të lashta njohin rëndësinë e Natës së Kadrit, e cila qëllon mes 10 ditëve të fundit të muajit të Ramazanit, në të cilën besohet se energjia e lutjes është e sinkronizuar dhe e shumëfishuar prandaj ritualet e besimit në të vlejnë shumë herë se ditët e tjera.
Nata e Kadrit (Nata kur Kur’ani zbriti në tokë) ndodh vetëm gjatë muajit të Ramazanit dhe zgjat një natë nga perëndimi i diellit deri në agim.
Sivjet udhëheqësit e besimit kanë deklaruar se Nata e Kadrit është nesër, të enjten e 27 marsit.
Besimi thotë se agjërimi në datën e Natës së Kadrit vlen sa 1 mijë muaj ose afro 80 vite, ku shpërblimi është më i madh se kurdoherë. ‘Kadr’, në arabisht përkthehet në ‘fat’ ose ‘dekret’ prandaj besohet se përmes lutjes myslimani mund të përmirësojë fatin e tij dhe atë që është shkruar për ta nga Zoti.
Nata e Kadrit është shumë e mundshme që të ndodhë gjatë dhjetë ditëve të fundit të Ramazanit, kur besimtarët janë më të angazhuar e fokusuar në adhurim dhe lutje. Ajo mund të bie në një nga këto data 21, 23, 25, 27, 29, dhe shumë muslimanë përpiqen të përkushtohen më shumë gjatë këtyre ditëve në lutje dhe adhurime për të pasur mundësinë për të ndjerë këtë natë të bekuar.
Gjatë natës së Kadrit, besimtarët angazhohen në adhurim të pandërprerë, duke lexuar Kur’an-in dhe duke u lutur për mirësi dhe udhëzim nga Zoti. Ky përkushtim ka një vlerë të madhe, dhe për ata që janë të sinqertë në lutjet e tyre sjell dobi dhe begati.
Nata e Kadrit është një mundësi për të pastruar shpirtin dhe për të bërë pajtim me Zotin. Ajo ofron mundësinë për të kërkuar falje për gabimet dhe për të arritur më shumë dije dhe afërsi me Allahun. Muslimanët besojnë se falja dhe begatia janë shumë më të mëdha gjatë kësaj nate, duke e bërë atë një moment të çmuar në kalendarin islamik.
Discussion about this post