Sekretari i Përgjithshëm i NATO-s Jens Stoltenberg ka reaguar për tensionet që janë krijuar në veri të Kosovës prej 4 ditësh. Ai iu drejtua të dy palëve, duke i bërë thirrje që të përmbahen nga përshkallëzimi shtesë dhe retorika provokuese.
Në një intervistë për France 24, Stoltenberg ka komentuar tensionet në Kosovë dhe ka thënë se forcat e NATO-s janë në gatishmëri, si dhe se po bashkëpunojnë ngushtë me BE-në.
“NATO është shumë e fokusuar në Kosovë, në Ballkanin Perëndimor. Ne kemi një histori të gjatë, kemi ndihmuar në ndalimin e dy luftërave etnike. Fillimisht në Bosnje dhe Hercegovinë dhe më vonë në Kosovë. Natyrisht, ne jemi ende të pranishëm atje, forcat e KFOR-it numërojnë më shumë se 4000 ushtarë dhe ata luajnë një rol kyç në stabilizimin e situatës”, tha Stoltenberg.
“Forcat tona janë të afta, të gatshme, por edhe në gatishmëri. Ata po monitorojnë situatën me vëmendje të madhe. NATO dhe BE bashkëpunojnë shumë ngushtë dhe mesazhi im për të dyja palët është që të përmbahen nga përshkallëzimi shtesë dhe retorika provokuese. U bëj thirrje atyre. për të lehtësuar tensionet në Kosovë”, shtoi Stoltenberg.
Kujtojmë se serbët nga veriu i Kosovës kanë bllokuar rrugët kryesore në shenjë proteste kundër arrestimit të një ish-pjesëtari të policisë së Kosovës, i cili dha dorëheqje nga pozita muajin e kaluar së bashku me serbët e tjerë. KFOR-i dhe EULEX-i u bënë thirrje qytetarëve që të zhbllokojnë rrugët, por kjo ende nuk ka ndodhur.
SHBA dhe Britania e Madhe i kërkuan Serbisë që të ftojë serbët vendas që të heqin barrikadat.
Discussion about this post