Agjensia Kombëtare për Hetimin e Krimit (NCA) në Mbretërinë e Bashkuar arrestoi mëngjesin e së enjtes një 24 vjeçar shqiptar pas një hetimi mbi një rrjet që trafikonte njerëz.
Shtetasi shqiptar u arrestua nga oficerët e NCA mëngjesin e sotëm (të enjten 25 janar) në shtëpinë e tij në Cheshunt, Herts, me dyshimin se ka ndihmuar në emigracionin e paligjshëm, thuhet në njoftimin zyrtar.
Ai dyshohet se ishte organizatori kryesor në një komplot kriminal që rregullonte kalimin me varka të vogla dhe gjithashtu besohet të ketë qenë i përfshirë në lehtësimin e emigrantëve brenda dhe jashtë Britanisë së Madhe duke përdorur HGV.
24-vjeçari dyshohet gjithashtu se ka përdorur një pasaportë origjinale të marrë me mashtrim për të hapur një numër llogarish bankare, të cilat janë përdorur për depozitimin dhe pastrimin e parave të fituara nga kriminaliteti.
Kreu i Operacioneve të NCA, Andy MacGill tha se ky arrestim është bërë si pjesë e një hetimi në vazhdim për kontrabandën e njerëzve duke përdorur varka të vogla përtej Kanalit.
“NCA nuk do të lërë gur pa lëvizur – në çdo hap të rrugës së kontrabandës së njerëzve – në punën tonë për të luftuar autorët e krimit të organizuar të imigracionit”, tha ai.
Discussion about this post