Me dhimbje është bërë i ditur lajmi për ndarjen nga jeta të gazetarit dhe mësuesit të njohur Vehbi Furxhi, në moshën 84-vjeçare. Një figurë e spikatur e jetës kulturore dhe mediatike të qytetit të Korçës, Furxhi ka lënë pas një trashëgimi të pasur profesionale dhe njerëzore.
Për shumë vite ai ishte një zë i rëndësishëm në fushën e gazetarisë lokale dhe kombëtare. Si drejtues i sektorit të kulturës në qytetin e Korçës, kontribuoi në organizimin dhe zhvillimin e aktiviteteve që pasuruan jetën kulturore të qytetit, duke sjellë risi dhe vëmendje ndaj vlerave artistike dhe intelektuale të rajonit.
Pas daljes në pension, ai nuk u tërhoq nga jeta publike, por vijoi të kontribuonte me përkushtim në arsim, si mësues në shkollën e mesme bujqësore, duke ndihmuar breza të tërë nxënësish në rrugën e dijes dhe formimit profesional.
Furxhi njihet gjithashtu për shkrimet e tij të mprehta dhe plot humor në revistën Hosteni, si dhe për rolin e tij si botues i gazetës “Korça”, ku mbrojti zërin dhe shqetësimet e qytetarëve të rajonit.
Humbja e tij lë një boshllëk të madh në fushën e gazetarisë, kulturës dhe arsimit. Kujtimi për Vehbi Furxhin do të jetojë gjatë në mendjet dhe zemrat e të gjithë atyre që e njohën, punuan me të, ose u frymëzuan nga fjala dhe veprat e tij.
Discussion about this post