Ish-kryeministri Fatos Nano është ndarë nga jeta në moshën 73-vjeçare.
Prej më shumë se 3 javësh Nano gjendej i shtruar në një spital privat në kryeqytet në gjendje të rëndë. Nano kishte pësuar vdekje klinike (arrest kardiocirkulator) në shtëpi dhe mbahej në vëzhgim nga mjekët prej javësh.
Fatos Nano u bë pjesë e politikës në kohën e ndërrimit të sistemeve në Shqipëri. Ai ishte themelues i Partisë Socialiste dhe e drejtoi këtë forcë politike për 14 vite. Si kryeministër i vendit, Nano ka shërbyer 3 herë. Koha më e shkurtër e qëndrimit si kreu i ekzekutivit ka qenë në vitin 1991, kur drejtoi kabinetin vetëm për tre muaj.
Po ashtu, ai shërbeu si kryeministër edhe në vitin 1997-1998.
Ndërsa koha më e gjatë e qëndrimit ka qenë mandati i tij i fundit. Si kryetar i Këshillit të Ministrave drejtoi qeverinë socialiste nga gushti i vitit 2002 deri në shtator 2005.
Fatos Nano është zgjedhur deputet i Parlamentit pesë herë. Deputet i Tiranës në vitin 1991. Deputet i Kuçovës në vitin 1992. Deputet i Tepelenës në vitin 1991 dhe në vitin 2001 si dhe deputet i Sarandës në vitin 2005 në 2009-ën.
Pas humbjes së zgjedhjeve parlamentare në vitin 2005, Nano dha dorëheqjen nga drejtimi i Partisë Socialiste.
Në vitin 2007 Nano tentoi të rikthehej në politikë duke kandiduar për postin e presidentit por nuk pati mbështetje nga Partia Socialiste dhe nuk fitoi.
Gjatë karrierës së tij politike Fatos Nano u përballë edhe me burgosje. Në vitin 1993 ai u burgos pasi u akuzua për korrupsion dhe abuzim detyre nga gjykata.
Fatos Nano lindi më 16 shtator të vitit 1952 në Tiranë dhe gjimnazin e kreu tek shkolla Sami Frashëri.
Studimet e larta i përfundoi për ekonomi dhe më pas u specializua në ekonomi politike. Për disa vite shërbeu në profilin e studimeve që kreu dhe më pas u angazhua në politikë.
Nano u martua dy herë, fillimisht me Rexhina Fatollin, me të cilën u nda pas 27 vitesh martese ndërsa në vitin 2001 u martua me Xhoanën. Nga martesa e parë, ai ka dy fëmijë.
Prej vitesh, Fatos Nano ishte larguar nga jeta politike në vend duke mbajtur një profil të ulët.
Discussion about this post