Aktori Willie Garson, i njohur për rolin e tij në “Sex and the City”, u nda nga jeta në moshën 57-vjeçare, njoftoi i biri, Nathen Garson.
“Të dua shumë baba. Pusho në paqe dhe jam shumë i lumtur që ndave të gjitha aventurat e tua me mua dhe munde të arrish kaq shumë,” shkroi Nathen në Instagram. “Jam shumë krenar për ty.”
Një zëdhënës i HBO/HBO Max gjithashtu konfirmoi vdekjen e Garson.
“Willie Garson ishte në jetë, ashtu si në ekran, një mik i përkushtuar dhe një dritë e ndritshme për të gjithë në universin e tij,” shkroi HBO në një deklaratë. “Ai krijoi një nga personazhet më të dashur nga panteoni HBO dhe ishte anëtar i familjes sonë për gati njëzet e pesë vjet. Ne jemi shumë të trishtuar që mësojnë për vdekjen e tij dhe i shprehim ngushëllimet tona të sinqerta familjes dhe të dashurve të tij.”
Në “Sex and the City”, Garson luajti Stanford Blatch, miku i protagonistes Carrie Bradshaw (Sarah Jessica Parker).
Cynthia Nixon, e cila luajti Miranda Hobbes, shkroi në Twitter: “Ne të gjithë e donim dhe adhuronim punën me të. Ai ishte shumë gazmor në ekran dhe në jetën reale.”
Willie Garson nisi të merrte leksione aktrimi që në moshën 13-vjeçare. Daljet e para ishin në shfaqjet televizive si “Cheers” dhe “Family Ties” në vitet ’80. Roli në “Sex and the City” i dha një tjetër njohje. Përpos tij, ai u shfaq në “White Collar”, “NYPD Blue” dhe “Hawaii Five-0”.
Garson ishte gjithashtu një mbështetës i fortë për birësimin dhe në vitin 2009, birësoi djalin e tij Nathen dhe ka kontribuar për organizatat që ndihmojnë fëmijët të gjejnë shtëpi përmes birësimit.
