Aktori amerikan James Michael Tyler, i cili më së shumti luajti si “Gunther” në serialin televiziv Friends, ka vdekur në moshën 59-vjeçare.
“Tyler ndërroi jetë paqësisht në shtëpinë e tij në Los Anxhelos të dielën në mëngjes”, thuhet në një deklaratë nga menaxheri i tij.
Tyler u diagnostikua me kancer të avancuar të prostatës në vitin 2018, i cili më vonë u përhap në kockat e tij. Gjendja e tij u përkeqësua gjatë periudhës së pandemisë, pasi nuk kishte mundur që të kryente të gjitha testet e nevojshme, duke bërë kështu që sëmundja t’i përhapej edhe në kocka.
James u bë i njohur si “miku” i shtatë i serialit. Ai ishte bërë pjesë e kastit fillimisht vetëm si figurant, por mori rolin e ri vetëm sepse dinte që të përdorte makinerinë e kafesë. Gjatë serialit, ai ka një interes për Rachel (Jennifer Aniston), por dashuria është vetëm nga ana e tij.
