Me makina private, pantallona të shkurtra, kapuçë, pistoleta në duar dhe me jelekë që i evidentonin si policë. Dy skuadra marrin pjesë në operacionin e koduar “Knock Out 2” që u finalizua me arrestimin e xhaxhait dhe nipit, Fatjon dhe Ergys Gjonaj.
Operacioni u zhvillua në hyrje të Vlorës, ku nga dy automjete private, vërshojnë civilë drejt një tjetër makine, duke bërë thirrjen “ndal policia”.
Pothuajse si skenat në filma, xhaxhai dhe nipi nxirren jashtë, vendosen barkas në tokë, me fytyrë në aspfalt, ndërsa policë civilë i vendosin prangat.
Gjatë kontrollit të automjetit të ndaluar u gjetën dhe sekuestruan në cilësinë e provës materiale, 2 mina me telekomandë, të programuara për shpërthim në distancë (të pajisura me aparat celular dhe me kapsolla detonatore), të cilat dyshohet se do të përdoreshin për kryerjen e ngjarjeve të rënda kriminale.
Nuk dihet nëse të arrestuarit e ditës së sotme kishin ose jo lidhje me arrestimin e Amarildo Nikollit, i njohur me nofkën “Shkodrani”, i cili u kap i armatosur një ditë në parë po në Vlorë, ndërsa policia i gjeti një armë me silenciator, kapuç, doreza.
Policia njoftoi se dy bashkëpunëtorët e Nikollit kishin mundur të largoheshin në operacionin e një dite më parë. Ndërkohë në njoftimin e sotëm thuhet “vijojnë veprimet e thelluara hetimore, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për të dokumentuar ligjërisht qëllimin e këtyre 2 shtetasve, si dhe për kapjen e 2 subjekteve të tjera të dyshuara të përfshira në këtë rast”.
Discussion about this post