Ndalohet ish drejtori i shëndetësisë dhe pronari i kompanisë, dyshohet për shkelje në tendera

Një tjetër rast i korrupsionit është goditur në Kosovë. Prokuroria Themelore në Gjilan ka ndaluar dy persona në Novobërdë, përfshirë ish-drejtorin e Shëndetësisë, nën dyshimin për “Keqpërdorim të pozitës apo autoritetit zyrtar”.

Sipas njoftimit të prokurorisë, ekziston dyshimi se kompania “AWA Sh.p.k” nuk i ka furnizuar Qendrat Kryesore të Mjekësisë Familjare të komunës së Novobërdës me barna dhe produkte tjera medicinale, por ka lëshuar fatura fiktive se kinse i ka furnizuar të njëjtat.

Kështu pronari i kësaj kompanie është ndaluar nën dyshimin për “Falsifikim të dokumenteve”.