Hungaria nuk do të mbështesë propozimin e Bashkimit Europian për të ndaluar importet e naftës ruse gjatë gjashtë muajve të ardhshëm, bëri me dije ministri i jashtëm i vendit, Peter Szijjarto.
Përmes disa pamjeve të publikuara në rrjetin social Facebook, Szijjarto është shprehur se furnizimi me energji i Hungarisë do të shkatërrohej plotësisht nga një embargo e BE-së ndaj naftës ruse, e cila sipas tij do ta bënte të pamundur për Hungarinë marrjen e naftës së nevojshme për funksionimin e ekonomisë hungareze.
Nga ana tjetër, më herët sot presidentja e Komisionit Evropian, Ursula von der Leyen ka thënë se furnizimi rus me naftë bruto do të ndalohet brenda gjashtë muajve të ardhshëm dhe produktet e rafinuara do të ndalohen deri në fund të vitit, ndërsa pranoi kërkesat nga vende si Sllovakia dhe Hungaria për fleksibilitet shtesë. Më tej Szijjarto tha se edhe me një vonesë, Hungaria mund të pajtohej me masat vetëm nëse importet e naftës së papërpunuar nga Rusia nëpërmjet tubacionit do të përjashtoheshin nga sanksionet.
Ndërkohë, ministri i marrëdhënieve ndërkombëtare i Hungarisë, Zoltan Kovacs, tha se vendi i tij do të vërë veton ndaj propozimit të BE-së. Në një intervistë për BBC, Kovacs e përshkroi propozimin si “të papranueshëm” dhe se ai do të shkatërronte ekonominë hungareze.
Së fundmi, Hungaria mori më shumë se gjysmën e importeve të saj të naftës bruto dhe produkteve të naftës nga Rusia vitin e kaluar, sipas Agjencisë Ndërkombëtare të Energjisë.
Discussion about this post