Një lajm i hidhur për komunitetin e futbollit. Ish-arbitri Mentor Sopjani u nda nga jeta sot në moshën 54-vjeçare pas një beteje të gjatë me sëmundjen e rëndë.
Sopjani ka një karrierë të spikatur për shumë vite si arbitër, ndërkohë që vazhdoi të punonte me futbollin në rolin e vëzhguesit të FSHF-së.
Presidenti i FSHF-së, Armand Duka, përmes një mesazhi të publikuar në rrjetet sociale i ka shprehur ngushëllimet familjes Sopjani dhe komunitetit të arbitrave për këtë humbje të parakohshme.
“Një lajm i trishtë ai i ndarjes nga jeta të Mentor Sopjanit, ish-arbitrit që dha një kontribut të vyer me vite me radhë në fushën e futbollit dhe më pas edhe jashtë saj, si vëzhgues.
Në emrin tim dhe të Federatës Shqiptare të Futbollit, i shpreh ngushëllimet më të sinqerta familjes, së afërmve, miqve dhe të gjithë komunitetit të arbitrave që humbën një mik, një koleg, një njeri të dashur.
Prehu në paqe Mentor!”, – shkruan Presidenti Duka në mesazhin e tij të publikuar në rrjetet sociale.
Discussion about this post