Pas ndërhyrjes së politikës në zgjedhjet për kreun e ri të FSHF-së, veçanërisht në asambletë e disa shoqatave rajonale, UEFA ka marrë masat duke përcaktuar një delegacion që do të vijë në Tiranë për të monitoruar ecurinë e procesit zgjedhor të Federatës Shqiptare të Futbollit. Ashtu siç edhe Presidenti i UEFA-s, Aleksander Ceferin e bëri me dije gjatë vizitës së tij në Tiranë pesë ditë më parë, janë përzgjedhur edhe tre emrat e zyrtarëve që do të përbëjnë misionin vëzhgues të qeverisë së futbollit evropian.
Përmes një shkrese zyrtare, UEFA ka njoftuar Presidentin e FSHF-së, Armand Duka për agjendën e vizitës së delegacionit që do të vlerësojë ecurinë e procesit zgjedhor e që do të mbërrijë në vendin tonë më 14 shkurt. Delegacioni përbëhet nga Luca Nicola, shef i qeverisjes së federatave anëtare në UEFA, Luca Nicola, shef i Çështjeve Korporative dhe Yann Hafner, ekspert i çështjeve statutore dhe rregulloreve.
“Bazuar në diskutimet e tij me Kryeministrin Rama dhe Ju, u ra dakord që UEFA të dërgonte një mision vëzhgimi me objektivin e vlerësimit të ecurisë së procesit zgjedhor të Federatës Shqiptare të Futbollit (FSHF) dhe Asamblesë së Përgjithshme Zgjedhore të Zakonshme të planifikuar për në datën 2 mars 2022. Dëshirojmë t’ju njoftojmë se delegacioni i UEFA-s do të përbëhet nga përfaqësuesit e mëposhtëm:
Luca Nicola (Shef i qeverisjes së federatave anëtare në UEFA)
Luka Zajc (Shefi i Çështjeve Korporative)
Yann Hafner (Ekspert i çështjeve statutore dhe rregulloreve)
Delegacioni do të udhëtojë për në Tiranë të hënën, 14 shkurt dhe do të kthehet të mërkurën, 16 shkurt. Ne do të jemi në kontakt gjatë ditëve të ardhshme për të diskutuar dhe organizuar takimet dhe ju falënderojmë paraprakisht për disponibilitetin e të gjithë stafit të FSHF-së” – shkruhet në letrën drejtuar Presidenti Duka.
Kujtojmë se, që kur ka nisur fushata për kreun e ri të FSHF-së, kryebashkiaku i Tiranës, Erion Veliaj, ka ndërhyrë në mënyrë të hapur, duke lëshuar lum akuzash ndaj kreut aktual, Armando Dukës. Ai gjithashtu është kapur edhe në një përgjim ku u bënte presion me fjalë banale anëtarëve të Shoqatës Tirana, që të mbështesnin kandidatin e propozuar nga ai dhe jo Dukën.
Discussion about this post