Justifikime jo bindëse, i ka konsideruar deputeti demokrat Tritan Shehu, deklaratat e Policisë së Shtetit, lidhur me ndërhyrjen në kampin e Mek në Manzë, ku u raportua për 1 person që humbi jetën dhe disa dhjetra persona të dëmtuar, si pasojë e gazit dhe sprite djegës të përdorur nga forcat special.
Nga studio e emisionit “Frontline” , Shehu tha se një ngjarje e tillë nuk duhej të ndodhte.
Ai e konsideroi atë që ndodhi si “dhunë të panevojshme”, e cila u krye si një veprim i qëllimshëm për të krijuar zhurmë.
“Nga shpjegimet e policisë, unë them se nuk janë bindëse për të justifikuar këtë ndërhyrje. Unë nuk bëj bilancet, por pashë të plagosur në spital. Kjo nuk duhet të ndodhte.
Ishte e shëmtuar ajo që ndodhi. Ishte dhunë e panevojshme. Policia ka shumë mjete të tjera për të vepruar. Ishte një ngjarje që duhet të evitohej. Perceptimi im është se ka qenë një veprim i qëllimshëm për të bërë zhurmë dhe të marrë këto dimensione.
Ka diçka që nuk shkon me linjat tona të politikës së jashtme prej vitesh. Një veprim i tillë ka qenë i qëllimshëm. Djegia e dokumenteve nuk justifikon atë ndërhyrje. Justifikimet tregojnë se diçka tjetër fshihet mbrapa. Janë justifikime qesharake, kur policia thotë se dikush po digjte një thes”, u shpreh ai.
Discussion about this post