Dorëheqja e kreut të 14 të kadastrës në Vlorë ka irrituar qytetarët të cilët nuk kanë arritur të gjejnë zgjidhje për pronat e tyre. Të revoltuar ata protestojnë dhe me tone të larta hedhin akuza në drejtim të këtij institucioni të cilin e konsiderojnë më të korruptuarin në vend. Një invalid dëshmon kalvarin e peripecive që po kalon për të marrë certifikatën e pronësisë, ndërsa përgjigjja që ka marrë nga zyrtarët e Kadastrës është “nuk dua unë ta jap”.
“Jam invalid, nuk dua unë ta jap thonë. Banoj në fshat, nuk duan. Po nuk pagove nuk ta bëjnë, tre vjet. Një vajte ardhje në fshat me bën 10 mijë lekë. Nuk dua, fjala e fundit ishte nuk dua. I kam të gjitha të rregullta, i kam paguar të gjitha kokërr me kokërr dhe taksat i kam paguar të gjitha. Është i 14-i drejtor që ndërrohet. Çfarë i kam bërë perëndisë nuk e di”, shprehet një banor.
Ndërsa një tjetër zonjë përpara dyerve të Kadastrës tejet e irrituar dëshmon se I kanë kërkuar të mos flasë.
“Më thonë mos flit, pse mos të flas për hipotekën time. Pse kërkoj të drejtën time këtu më sjellin policinë, kush është policia, a nuk kam të drejtën time si qytetare”, thotë ajo.
Pronat në bregdetin e Vlorës kanë sjellë përplasje dhe revolta të vazhdueshme të banorëve të cilët ende nuk kanë marrë zgjidhje. Dorëheqjet përkeqësojnë edhe më tej këtë situatë.
