Diplomati i njohur Hajdar Muneka, me një përvojë shumë të gjatë është ndarë në mbrëmjen e së enjtes nga jeta në moshën 68-vjeçare.
Bëhet me dije se prej kohësh ai vuante nga një sëmundje e rëndë, me të cilën luftoi deri në frymën e fundit, por pa mundur ta fitojë këtë betejë për jetën.
Hajdar Muneka kontribuoi për vite me radhë në shërbimin diplomatik dhe ishte një njohës shumë i mirë i çështjeve aziatike. Ai gjithashtu ishte ambasador i Republikës së Shqipërisë në Kinë dhe Maljazi, dhe jo rezident në Singapor, Korenë e Jugut Bangladesh, Japoni, Australi, Zelandën e re e të tjerë.
Kujtojmë se nga profesioni i gazetarit në Radio Tirana, ai kaloi në Ministrinë e Punëve të Jashtme, duke i dhënë një kontribut të spikatur diplomacisë shqiptare.
Si botues i librit “Dritëhijet e një miqësie që çuditi botën” një ese me vlerë për historinë e marrëdhënieve midis Shqipërisë dhe Kinës, si dhe të një vepre tjetër nga kjo temë e cila pret që të botohet pas ndarjes së tij nga jeta, harmonizoi me mjaft mjeshtri aftësinë e gazetarit me atë të diplomatit.
Hajdar Muneka ishte edhe anëtar themelues i Këshillit të Ambasadorëve shqiptarë, ku kontribuoi me eksperiencën tij të gjatë të fushës së diplomacisë.
Discussion about this post