Ndërron jetë në spital i moshuari që u qëllua në lokalin e tij në Shkodër

Një ngjarje e rëndë ka ndodhur mbrëmjen e djeshme në fshatin Stom-Golem të Shkodrës. Një 76-vjeçar është qëlluar 16 herë me pistoletë.

I moshuari Lulash Qipuri, është dërguar në gjendje të rëndë në spital, dhe pas ndërhyrjes së bërë nga mjekët nuk ka mundur t’i mbijetojë plagëve të marra.

Autori ka qenë i maskuar në momentin që ka mbërritur në lokalin e Qipurit.

Menjëherë ka reaguar djali i të plagosurit, i cili ka qëlluar 10 herë me shotgun në drejtim të autorit, por ky i fundit është larguar me vrap, dhe ka hipur në një makinë që e priste pak më lart.

I moshuari ka qenë i ulur në momentin që është qëlluar, pasi ishte invalid.

Gjithashtu raportohet se 76-vjeçari ka qenë i arrestuar në vitin 2011 për trafikim dhe prodhim të lëndëve narkotike dhe për armëmbajtje pa leje.

Grupi hetimor nën drejtimin e Prokurorisë po vijon punën për zbardhjen dhe sqarimin e plotë të rrethava të ngjarjes.