5 zyrtarë të Bashkisë Elbasan kanë rënë në pranga këtë mbrëmje pasi, dyshohet se kanë lejuar disa ndërtime pa leje. Mësohet se pas një kontrolli për goditjen e krimit mjedisorë, policia ka evidentuar që punonjësit e IMT Elbasan kanë shfrytëzuar detyrën dhe kanë lejuar ndërtimin pa leje të një objekti në lagjen “5 Maji”. Fillimisht është bërë arrestimi i shtetasit Y.B., banues në lagjen “5 Maji” Elbasan , pasi është kapur në flagrancë duke kryer ndërtime pa leje në një magazinë”.
Në këtë kuadër, policia ka arrestuar edhe ish-kryeinspektori i IMT-së në Elbasan, bashkë me të edhe 4 zyrtarë të të tjerë, të cilët kanë qenë pjesë e Inspektoratit të Mbrojtjes së Territorit në Bashkinë Elbasan dhe kanë lejuar në dijeni të plotë ndërtimin pa leje të objektit.
Valë arrestimesh për krime mjedisore
Arrestimi i 5 punonjësve të IMT ka ardhur si pasojë e një operacioni të madh që Policia e Shtetit po kryen në të gjithë vendin për të goditur rastet e krimit mjedisor. Nga kontrollet e kryera janë gjetur një sërë shkeljesh dhe si pasojë janë prishur furra artizanale të prodhimit të gëlqeres, që përdorin kryesisht goma të automjeteve për djegie. Gjithashtu, janë konstatuar dhjetëra raste të prerjes së paligjshme të pyjeve, gërryerjes së lumenjve dhe ndotjes së tyre apo të hedhjes së inerteve, që shkaktojnë ndotje të ajrit. Në këtë kuadër janë proceduar dhe arrestuar personat përgjegjës të këtyre krimeve mjedisore.
Nga të dhënat e publikuara nga policia bëhet me dije se vetëm dy javët e fundit, si rezultat i kontrolleve në të gjithë vendin janë evidentuar 215 vepra penale në fushën e mjedisit. Në këto krime mjedisore janë përfshirë 213 autorë të veprave të ndryshme penale, nga të cilët 23 janë arrestuar në flagrancë, 184 janë proceduar në gjendje të lire dhe 6 janë shpallur në kërkim.
Ndërsa në 24 orët e fundit janë evidentuar 6 raste që kanë të bëjnë kryesisht me veprën penale “Menaxhimi i mbetjeve”, ku janë konstatuar kamionë që transportonin inerte, të cilat i kanë hedhur jo në vendet e përcaktuara, por kryesisht buzë rrugëve dhe lumenjve.
Po kështu, shqetësuese mbeten ndërtimet pa leje, janë evidentuar 97 raste të tilla; prerja e paligjshme e pyjeve, janë evidentuar 55 raste dhe janë sekuestruar rreth 100 metër kub lëndë drusore e prerë në mënyrë të paligjshme. Po kështu shqetësuese janë edhe gërryerja e lumenjve, djegia e gomave dhe e mbeturinave, duke shkaktuar ndotje të ajrit. Ndërsa vijojnë kontrollet për të parandaluar raste të tjera.
Discussion about this post