Banorët e fshatit Moravë kanë zhvilluar sot një protestë për të kundërshtuar ngritjen e një baze ajrore nga NATO, e cila është parashikuar të ndërtohet në pistën e aviacionit të Kuçovës. Ata kërkojnë që shpronësimi i pronave të tyre të bëhet njësoj si në rajon, pasi vlerësimi që qeveria iu ka bërë me 1.80 euro për metër katror është i papranueshëm.
“Të bëhet projekti i NATO-s por shpronësimi të vlerësohet si në vende të tjera të rajonit si në Kosovë që u vlerësua për 75 dollarë për metër katrorë për tokë, apo në Greqi për 60 euro, ne na e japin për 1.80 euro për metër katrorë. Po na heqin bukën e gojës. Rama ta kuptojë këtë se i dhamë mandatin e tretë. Nga 200 mijë euro që kam shpenzuar për shtëpinë me jep 90mijë euro.”, shprehet një banor.
“Shteti po me merr shpirtin ku të shkoj ku të mbytem në këtë moshë.”
Janë të paktën 213 familje që nuk pajtohen me vlerën e shpronësimeve prej 203 lekë për metër katrorë, teksa theksojnë se kanë ankimuar shkresën e ardhur nga Ministria e Mbrojtes.
“S’jemi dakord me çmimin e tokës pikë mbaroi. Erdhi shkresa nga Ministria e Mbrojtjes që do jetë 2 milionë e 300. Bëmë ankesë. Ne nuk largohemi të marrin ekspertë të shohin me sa shitet toka këtu,” thotë një banor.
Ata shprehen se kërkesat e ardhura në shkresë janë qesharake.
“Më thonë në shkresë sposto serën, sera s’është objekt ta lëviz me rrota ku ta çoj.”
Banorët paralajmëruan se nëse prona e tyre nuk vlerësohet siç ata pretendojnë, do të zhvillojnë sërish protestë, por këtë herë pranë Ministrisë së Mbrojtjes.
Discussion about this post