Vijojnë përplasjet mes banorëve të Laknasit dhe punonjësve të policisë për të kundërshtuar ndërtimin e thertores nga një kompani, çështje për të cilën banorët dhe këta të fundit janë në gjykatë prej 3 vitesh.
Ky projekt ka vazhduar në vitin 2019, por banorët tashmë kanë bllokuar punimet duke mos lejuar që punonjësit e kompanisë të vijojnë punën e tyre.
Ditën e djeshme banorët kanë shkuar për të takuar Rakip Sulin, kryetarin e Bashkisë Kamzë. Në takim kanë marrë pjesë dhe përfaqësues së firmës që do ndërtojnë thertoren, ku u vendos që deri më datë 20 tetor që është seanca gjyqësore, të mos vijojnë punimet.
Edhe pse u vendos që deri më datë 20 tetor nuk do të kishte asnjë punim për ndërtimin e thertores në Laknas, firma ka dërguar në orët e para të mëngjesit fadromën për të kryer punime. Fadroma ka prerë dhe shkatërruar dhjetëra pemë gjatë natës, duke hyrë nga rruga dytësore, pasi tjetra është e bllokuar nga banorët.
Ndërhyja e fadromës ka shkaktuar sërish përplasje mes banorëve, të cilët refuzojnë prerjen e pyllit dhe punëtorëve të firmës. Situata është përshkallëzuar më tej, pasi banorët kanë gjuajtur me sende të forta xhamin e fadromës, ndërkohë që është dashur edhe ndërhyrja e policisë së Kamzës.
Pas takimit që zhvilluan ditën e djeshme me Sulin, banoret u shprehën se do të presin vendimin e gjykatës, ndërsa kërkojnë zbatimin e ligjit, ndryshe do mbrojnë pronën fizikisht.
“Përderisa nuk ka asnjë dokument ligjor, ne deri me datë 20 tetor do presim vendimin e gjykatës. Vumë në dijeni kryetarin e Bashkisë dhe i kërkuam të mbrojë interesin publik brenda territorit vet, i thamë që leja e ndërtimit nuk ka më vlefshmëri pa leje mjedisore. Ne nuk kërkojmë zgjidhje afatshkurtra, por zbatimin e ligjit, leja e ndërtimit është dhënë në mënyrë abuzive dhe herën e parë, vetëm të zbatohet ligji nuk po kërkojmë favore. Akoma nuk është marrë një vendim i formës prerë , kompania pretendon të fillojë punimet, por ne nuk do e lejojmë. Banorët do ta mbrojnë fizikisht deri në daljen e vendimit përfundimtar. Nëse nesër nuk pranojnë të ulen në tryezë për të rënë dakord ne do vazhdojmë në përplasje fizike deri në zgjidhje të situatës”– u shprehën banoret.
Ndërsa përkrah banorëve janë bashkuar edhe aktivistë të tjerë të shoqatave të ndryshme, përfshirë dhe ish- avokatin e popullit, Sazan Guri.
Guri i bëri thirrje ministrit të Brendshëm Bledi Çuçi dhe kryeministrit Rama që të vijnë në këtë zonë për të dëgjuar kërkesat banorëve. Guri ka kërkuar që të pritet vendimi përfundimtar i Gjykatës së Apelit i cili del më 20 tetor.
“Më 20 tetor është Gjyqi i Apelit, këta nuk presin vendimin por duan ta ndërtojnë sa më shpejt. Kam një thirrje për Bledi Çuçin. Policët e Kamzës mos vijnë që të kërcënojnë qytetarët që protestojnë por të vijë këtu t’i japë përgjigje kërkesës së banorëve. Ndërsa për Edi Ramën doja që t’i thoja të hapë telefonin kur i bie, e di unë që është i zënë me punë të tjera, por pasdite ka kohë për të folur edhe për këtë problematikë”, shpreh ai.
Pavarësisht këtyre deklaratave, përplasjet kanë vijuar sërish mes banorëve dhe policisë.
