Një tjetër shqiptar i cili dyshohet si udhëheqës i një rrjeti ndërkombëtar të trafikut të drogës ka tërhequr vëmendjen e autoriteteve të huaja. Mësohet se shqiptari Ylli Didani ka blerë një parcelë buzë detit në Republikën Domenikane me vlerë tre milionë dollarë, duke përdorur fonde të siguruara nga trafiku i drogës.
Sipas provave të paraqitura nga prokuroria në një gjykatë federale në Shtetet e Bashkuara, zbulojnë se Didani ka transferuar më shumë se 200 mijë dollarë në SHBA përmes sistemit të paligjshëm të njohur si “metoda e tokenit”, si pjesë e procesit për të finalizuar blerjen e tokës në territorin domenikan. Pagesa është lehtësuar nga rrjete të pastrimit të parave të lidhura me krimin e organizuar kinez, të njohur si “kinezët”, të cilët menaxhonin lëvizjen globale të fitimeve nga trafiku i drogës.
Çështja u mbyll së fundmi me një vendim fajësie ndaj Didanit për akuzat e komplotit për shpërndarje të kokainës, shpërndarjes së drogës në anije nën juridiksionin e SHBA-së, dhe komplotit për pastrim parash. Autoritetet amerikane e kanë identifikuar atë si drejtues të një organizate me operacione në SHBA, Amerikën e Jugut dhe Europë, të përfshirë në transportimin e ngarkesave të mëdha të kokainës.
Midis viteve 2019 dhe 2020, autoritetet kanë kapur më shumë se 3,400 kilogramë kokainë, të transportuar në pesë anije të ndryshme, me një vlerë të vlerësuar në treg mbi 100 milionë dollarë. Gjithashtu, gjatë gjyqit u zbulua se 43-vjeçari dhe bashkëpunëtorët e tij kishin krijuar një dron nënujor për të fshehur dhe transportuar drogë të ngjitur në trupin e anijeve tregtare me destinacion Europën.
Didani mund të përballet me një dënim maksimal me burgim të përjetshëm dhe vazhdon të mbahet në paraburgim federal në pritje të shpalljes së dënimit. Hetimi është kryer nga agjentë të DEA-së, Shërbimit të Tatimeve të Brendshme (IRS-CI), Zyrës së Doganave dhe Mbrojtjes Kufitare të SHBA-së (CBP) dhe departamente të policisë lokale në Michigan.
Discussion about this post