Policia e Shkodrës ka shpallur në kërkim tre pronarë objektesh në Shirokë, pasi akuzohen për ndërtim pa leje. Po ashtu, nën hetim penal janë vënë edhe 3 punonjës të IKMT-së në Bashkinë e Shkodrës për mos ushtrimin e detyrave funksionale në verifikimin dhe raportimin e tyre.
Sipas njoftimit, janë proceduar penalisht Z. P., 66 vjeç , Gj. L., 67 vjeç, N. B., 49 vjeç dhe Gj. N., 36 vjeç, të tre banues në Shkodër, për veprën penale “Dhënie ndihme për ndërtim të paligjshëm” pasi në afërsi të rrugës së lagjes Zogaj, janë konstatuar duke ndërtuar një mur rrethues pa lejen përkatëse, në pronën e B. T., i cili u shpall në kërkim si pronar i objektit për veprën penale “Ndërtim i paligjshëm”.
Gjithashtu, u procedua për “Dhënie ndihme për ndërtim të paligjshëm” M.Gj., 60 vjeç, banues në Shkodër, që u konstatua në rrugën e Zarufës në lagjen Shirokë, Shkodër, duke ndërtuar një mur rrethues pa lejen përkatëse, në pronën I. Z., i cili u shpall në kërkim për “Ndërtim paligjshëm” si pronar i objektit.
Të proceduar penalisht në gjendje të lirë janë edhe E.K., 30 vjeç, M.H., 37 vjeç dhe M.M., 30 vjeç, të tre banues në Shkodër, me detyrë punonjës të IKMT në Bashkinë e Shkodrës, për veprën penale “Shpërdorim detyre”, pasi dyshohet se kanë ushtruar kontroll në objektin e Gj.H., 41 vjeç, banues në lagje Vasil Shanto, Shkodër dhe nuk kanë zbatuar detyrat funksionale në verifikimin e ndërtimit që ky shtetas po bënte. Gj.H., u shpall në kërkim si pronar i objektit për veprën penale “Ndërtim i paligjshëm”.
Discussion about this post