Këtë të martë Teuta do të ndeshet me Dinamon në ‘Elbasan Arena’ në orën 16:45, takim i vlefshëm për javën e 12 të Superligës.
Durrsakët vijnë këtë sfidë pas barazimit 1-1 me Vllazninë, teksa kryeqytetasit pas disfatës së thellë 5-0 ndaj Laçit.
Në konferencën e dhënë për mediat në prag të kësaj sfide, trajneri i ‘Djemve të Detit’, Renato Arapi, ka folur për sfidën me ish-shokun e skuadrës, Bledi Shkëmbin, por tashmë të dy në poste të drejtuesve të stolave.
“Situata është optimale, të paktën për pjesën e mungesave jemi të qetë. Mungon vetëm Daja që është me kartonë të verdhë. Atmosfera është shumë e mirë para ndeshjes me Dinamon. Të them të drejtën nuk e kisha menduar që do kishte ardhur kaq herët përballja me të. Si unë, si Bledi, jemi mësuar me sfida të reja. Mendoj se do të jetë një sfidë e bukur nesër”.-tha ai.
Më tej ai shtoi se në skuadër janë bërë ndryshime për sa i përket sulmit, ndërsa theksoi se është punuar edhe në aspektin taktik.
“Jemi munduar të bëjmë pak ndryshime, në mënyrën e sulmit, në manovër dhe në mënyrën se si do të bëjmë presing. Shpresojmë që t’i bëjmë ato që kemi kërkuar. Normalisht gjithë këtë periudhë kemi punuar në aspektin taktik, në aspektin mbrojtës. Normalisht që edhe koha është e shkurtër. Ato 2-3 gjëra që kam kërkuar, shpresoj që lojtarët t’i kenë memorizuar dhe t’i shfaqin edhe në fushë”.-shtoi ai.
Rikujtojmë se Renato Arapi mori drejtimin e Teutës pas largimit të Edi Martinit, duke lënë postin e drejtorit sportiv, ndërsa në takimin e tij të parë si trajner mori një pikë./K.T/Gijotina.com
Discussion about this post