Në prag të ndeshjes së Kombëtares me Andorën kapiteni i ‘Kuqezinjve’, Elseid Hysaj ka dalë në konferencë për mediat përkrah trajnerit Edoardo Reja.
Mbrojtësi u shpreh se është e vështirë që kombëtarja të vijë me moral të lartë në këtë sfidë pas asaj humbjeje të thellë ndaj Anglisë.
“Është një humbje e thellë dhe na ka ulur pak motivimin, por këto ditë kemi qëndruar të bashkuar, është një humbje që duhet harruar, kemi dhe një ndeshje tjetër dhe do të kërkojmë maksimumin për t’i mbyllur në mënyrën më të mirë këto eliminatore”.-tha ai.
Më tej Hysaj shtoi se shkalla e vështirësisë përballë një ekipi si Anglia ishte maksimale.
“Ishte një humbje vërtetë e rëndë por nuk duhet të harrojmë që luajtëm ndaj Anglisë, një kundërshtari që ka në përbërje lojtarë të kalibrit të lartë botëror, gjithsesi kjo humbje do të na shërbejë si një mësim për t’u ringritur”.-u shpreh lojtari.
Ndërsa më tej kapiteni i ‘Kuqezinjve’ paralajmëroi shokët e skuadrës të mos e marrin lehtë Andorën, pasi duke rikujtuar të shkuarën ka theksuar se është një ekip që u ka shkaktuar probleme.
“Historia na thotë që Andorra është një ekip që bezdis të gjitha skuadrat dhe nuk është e lehtë të përballesh. Por ne gjatë këtyre viteve jemi rritur, jemi përmirësuar, jemi një skuadër më e fortë se më parë. E dimë që Andorra është një ekip i rrezikshëm, por ne do të hymë në fushë për të fituar. Vendi i 3-të është një pozicion i mirë për ne, e kemi vendosur disi në rrezik por gjithsesi besojmë që do ta mbyllim grupin me 18 pikë. E kemi vlerësuar maksimalisht Andorrën dhe do të kërkojmë 3 pikët në këtë sfidë”-tha ndër të tjera Elseid Hysaj.
Ritheksojmë se Kombëtarja do të ndeshet këtë të hënë në orën 20:45 në ‘Air Albania’ me Andorën, në takimin e fundit të kualifikueseve të Botërorit ‘Katar 2022’, tashmë me zero mundësi për të vazhduar më tej këtë ëndërr./K.T/Gijotina.com
Discussion about this post