Më 12 gusht Partizani luan një nga miqësoret më prestigjioze. Të kuqtë sfidojnë Romën e Murinjos dhe Kumbullës, me këtë të fundit që pritet të mos jetë në fushë për shkak se po rikuperohet nga dëmtimi i rëndë në ligament, që pësoi në fundin e sezonit të shkuar.
Pas miqësores mes dy skuadrave të femrave, e zhvilluar pak muaj më parë, tashmë dy klubet kanë gjetur edhe akordin për zhvillimin e një tjetër ndeshjeje, këtë herë mes djemve, në të tjera përmasa e me një interes shumë më të madh, diçka që duket edhe nga numri i biletave të shitura deri më tani, kur jemi edhe pesë ditë larg sfidës, që nis në orën 20:00 dhe luhet në stadiumin “Air Albania”. Mbrëmjen e shkuar numri i biletave të shitura shkonte 6100 të tilla.
AXHENDA
Para kësaj sfide, media sportive shqiptare “Panorama Sport” ka zbuluar axhendën e skuadrës nga kryeqyteti i Italisë fqinje, që do të vijë dhe do të largohet brenda ditës së shtunë të 12 gushtit. Duke përfituar nga afërsia gjeografike, Roma do të vijë në Tiranë vetëm 9 orë para nisjes së sfidës. Është planifikuar që skuadra nënkampione e Ligës së Europës, të zbarkojë në aeroportin e Rinasit, për t’u akomoduar më pas në një nga hotelet më të njohura në Tiranë.
Pak orë para ndeshjes, ekipi i Romës do të vizitojë për herë të dytë stadiumin “Air Albania”, ku një vit e dy muaj më parë arriti të fitojë trofeun e Ligës së Konferencës. Ekipi do të largohet direkt pas ndeshjes, duke planifikuar që të qëndrojnë në vendin tonë rreth 11 orë gjithsej.
Murinjo në zbarkimin e parë në Tiranë ka shfaqur simpati për Shqipërinë dhe shqiptarët, me të cilët ka pasur të bëjë në karrierën e tij të gjatë si trajner. Mbetet të shihet nëse klubi roman do të lejojë prononcime të trajnerit dhe lojtarëve para apo pas ndeshjes.
Kjo ndeshje e Romës ndaj Partizanit do të jetë miqësorja e fundit para nisjes së Serisë A. Kryeqytetasit më 20 gusht do të sfidojnë Salernitanën në javën e parë të kampionatit. Ditën e djeshme Roma mposhti 2-1 Tuluzën në miqësore.
FUSHA
Terreni i blertë i stadiumit “Air Albania” mund të themi se është një nga problemet kryesore të organizatorëve para kësaj sfide. Roma do të gjejë në Tiranë një fushë të degraduar që nga finalja me Fejnordin në maj të vitit të shkuar. Edhe trajneri i Beshiktashit, Senjol Gynesh, pas ndeshjes me Tiranën kritikoi ashpër fushën e stadiumit, duke u shprehur se ishte shumë e fortë dhe se ai stadium meriton një terren të nivelit më të lartë./PanoramaSport
Discussion about this post