Është shoqëruar në polici personi që ka ndihmuar Habib Rexhën që të largohet nga vendngjarja, pas vrasjes në Kavajë. Ervis Kurti është shoqëruar dhe pritet të merret në pyetje.
31-vjeçari u shpall në kërkim nga policia pasi akuzohet si autor i vrasjes së Arian Gosës pasditen e së dielës në Kavajë. Ai sot u dorëzua. Sipas policisë Rexha shkoi në lokalin ku Ariani po pinte kafe me babain e tij dhe e qëlloi me plumb në kokë duke i marrë jetën në vend.
Më pas Rexha u largua nga vendi i ngjarjes në këmbë, por se kishte arritur në vendngjarje me makinën e një shoku. Motivi pse 31-vjeçari ka ndërmarrë këtë akt të rëndë është hakmarrja. Dy muaj më parë, vëllai i Gosës dhe vëllai i tij u konfliktuan me njëri-tjetrin në mes të Kavajës dhe të dy mbetën të vrarë.
Armand Gosa u konfliktua me Altin Rexhën ku të dy humbën jetën, njëri i qëlluar me armë dhe tjetri me thikë. Pas një sherri për motive banale, Gosa qëlloi me thikë 43-vjeçarin Altin Rexha me origjinë nga Kukësi ndërsa ky i fundit iu përgjigj duke e qëlluar me një pistoletë që mbante me vete.
Si pasojë e plagëve të marra, të dy personat e përfshirë në konflikt, ndërruan jetë në spital. Ata u zunë për një konflikt me motive krejt banale, se përse kishin parë shtrembër njëri-tjetrin.
Por edhe pse ngjarja u mbyll me 2 viktima nga të dyja palët, 31-vjeçari Habib Rexha ka vendosur të hakmerret edhe më shumë duke vrarë edhe vëllain e Armand Gosës.
Discussion about this post