Ndodh edhe kjo në Shkodër! U rrëzua me biçikletë, policia e procedon

Një 51-vjeçar i cili është rrëzuar me biçikletë, është në telashe me policinë e Shkodrës, pasi është proceduar penalisht.

“Gjithashtu, specialistët e Sektorit të Qarkullimit Rrugor referuan materialet në Prokurori, pasi dje, në aksin rrugor “Shkodër-Velipojë”, shtetasi M. Y., 51 vjeç, duke lëvizur me biçikletë, është rrëzuar dhe si pasojë është dëmtuar lehtë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme”, informonte polica.

Lidhur me këtë njoftim, gazetari Lutfi Dervishi ka ironizuar në Facebook, procedimin e 51-vjeçarit, teksa shkruan se policia po kërkon me ngulm prodhuesin e biçikletës.

Më tej ai shkruan se dosja i kalon prokurorisë, e cila pritet të mos hapë çështje penale, por të përballet vetë me një hetim disiplinor.

Postimi i Dervishit:

Policia zbardh misterin e aksidentit

Në një operacion të suksesshëm informativ, specialistët e Qarkullimit njoftuan se shtetasi M.Y., 51 vjeç, u rrëzua nga biçikleta e tij në aksin Shkodër – Velipojë dhe… u dëmtua lehtë. Materialet procedurale u referuan në Prokurori.

Burime konfidenciale bëjnë me dije se policia po kërkon me ngulm prodhuesin e biçikletës.

Dosja i kalon prokurores Gjeli, e cila pritet të mos hapë çështje penale, por të përballet vetë me një hetim disiplinor.

Sipas burimeve të policisë: Askush nuk është mbi ligjin, as biçikleta”.

Ndërkohë që policia ishte e zënë  me operacionin “biçikleta” një makinë u përplas me dyqanin në aksin Shëngjin-Velipojë, dhe u plagosen 4 anëtarë të një familjeje